張晨：等巴士心情　有誰能共嗚？

每次遲到，一定有幾個因素。包括「太易熄嘅鬧鐘」、「好想瞓嘅自己」，再加上一架「消失的巴士」。

而一架出色優秀嘅「消失的巴士」，甚至可以將你由「早到」變「遲到」。我成日都話，若然嗰日嘅行程係好重要，你揀搭巴士就等於將人生放喺賭枱上面，任由輪盤轉動，睇天做人。

但今次我就親自送自己上賭枱，喺極重要嘅Meeting間，選擇咗巴士做交通工具。

冇計啦，人係咁犯賤。地鐵又要逼又要企；的士又冇錢搭，淨返嘅就係巴士一途。

其實我已經預早咗好多出門口，以「6-10分鐘」一班車嘅速度，我就算落到去「送車尾」都唔需要擔心，大把時間等下一架。

不過人生有時係好多巧合嘅，而呢堆巧合多數都會夾手夾腳推你落火山洞口。

一落到車站，真係送車尾，睇住架巴士絕塵而去，我連嘗試跑去以身擋車嘅機會都冇。可能上天已經警戒緊我唔好搭巴士，不過人類總是狂妄。

我望下錶，知道等10分鐘都唔係問題，一於企定定，嚟一個逆天而行。

頭6分鐘，心情非常從容，享受涼風表情輕鬆，有唔同巴士掟彎入嚟，我心入面都會諗：「係呢架啦掛？」

可惜經過咗9分鐘，巴士都未到。

呢個時候好關鍵，因為佢寫明每班車「6-10分鐘」，咁即係下一分鐘就有車啦。

冇錯，每個人都有思想盲點。我當時嘅所有想法都基於「6-10分鐘」嘅理論。

但「6-10分鐘」會唔會係流嘅呢？我冇深究過。

應該咁講，我都諗過未必真係10分鐘，但12分鐘都一定到掛？

嗱，呢種心態就叫「心存僥倖」。

所謂「12分鐘都一定到」只係主觀情緒推測，一廂情願，同暗戀係冇分別，所以都唔會有結果。

12分鐘過去，咩車都冇。

我開始焦急，會諗：「點呀，當6分鐘一架，都應該嚟第二架啦！」

冇錯，開始絕望啦。當人焦急，諗嘢就會偏激，「6-10分鐘」亦會當成6分鐘一班，從而令自己嘅怨憤更加合理。

15分鐘過去，仲係冇車。

我情緒已經失控，因為真係接近遲到，我想瘋狂打電話投訴，不斷自言自語四字粗口，目露凶光。

你會諗「算啦，跑去轉地鐵啦。」但我冇咁做，因為身體內另一種情緒又搵上門，佢嘅學名叫「唔輸得好勝症候群」，俗稱「賭仔心態」。

「等咗15分鐘，冇理由唔等埋佢啫！架車一定就到！」呢句其實同「輸咗咁多錢，冇理由唔贏返舖啫！啲運一定就到！」結構完全相同，我非常危險。

果然我真係鬥氣！繼續等！

20分鐘，仲係冇車。

我嗰時已經冇心情嬲，而係好慌張，開始求神拜佛，放低所有自尊，懺悔自己嘅狂妄，只求一架巴士拯救我嘅人生。

呢一刻，同一個賭仔輸晒成副身家，再輸埋大耳窿嘅錢一樣，終於醒覺，係時候要畀人押返香港。

而我都終於放棄巴士，轉逼地鐵再飛的士。雖然睇落好小事，但等巴士呢20分鐘，感覺好似一個人生嘅濃縮一樣。

好多嘢諗就「6-10分鐘」，出到嚟就25分鐘甚至25個鐘。但仲要心存僥倖，又加啲賭仔心態，就足以令準備充足變成一鑊粥。

最後我只想講一句，巴士唔好成日脫班得唔得呀！害死人架！

原文刊於作者張晨 fb ，獲作者授權轉載。